Edmund 的个人资料讓自已的故事從頭開始照片日志列表更多  |  工具 帮助 |
|
|
4月27日 雜記京都之旅後，就再無寫過野。 一來，工作好忙好忙。 二來， MSN Spaces 經過更新之後，真係煩到唔想用，放相又煩。 三來，放相果個 server 成日死 link，搞到無心機再搞。
十二月，聖誕節，整左個蛋糕比花輪， 今次整得太急，唔夠時間，雖然樣衰衰，不過又幾好味。
三月，生日。 難得一班朋友幫我做生日， 呀醬姐仲整左個生日蛋糕比我。 同我整果個比，佢果個簡直係專業水準。
三月， 本來諗住同花輪去泰國旅行，作為自已既生日禮物， 不過太急買唔到機票，結果，要三月尾先出發。 好彩早左去，如果再遲兩星期，又會撞正暴動。
六月，再出發。 10月6日 賣車經濟唔好，投資失利， 想儲多幾個錢防身， 又開唔到源，只好節流。
上個月開始，己由開車返工，改為坐巴士。 但經過一個月，情況仍然無改善。 突然諗起，我係咪應該賣車呢？ 當年經濟更差既時候，都無諗過賣車， 估唔到今日依個念頭突然浮現。
不過賣車真係一件好煩既事， 賣比車行就比人壓價壓到好底， 放上網賣比街外人呢，又試又驗又要過數仲要上運輸處， 分幾日去搞，真係好煩。
過幾日，等天氣好少少， 就幫架車影相放上網賣啦。 架車仲放左好多野，有排執。 8月31日 白泥。天野。情緒。壽衣
幾耐無去白泥呢？都有半年。 每次去白泥，心情都好極端。 一系，就同自已喜歡既人去， 一系，就心情沉重要去靜靜。
人老左，真係訓唔到咁多， 雖然放假，但都係一早彈起身， 結果一口氣睇左三個展覽。
Deva Loka Rouge & Bleu by Yoshitaka Amano Art Statements Gallery, 5 Mee Lun Street, Central 04.09.2008 - 17.10.2008
搵左好耐先搵到，原來就響"九記"上面， 展覽無乜人睇，今日仲見到天野喜孝本人， 可惜自已英文唔掂，唔敢上前傾談。
之後去左 agns b. LIBRAIRIE GALERIE， 睇 emotions by Readymade Magazine & Friends。 18 Wing Fung Street, Wan Chai 23.08.2008 - 01.11-2008
睇完，時間仲好早，去左"華南"食碗麵， 之後就去集成中心睇一個有關 壽衣 既展覽。 華麗上路 ~ 壽衣再想像 11.08.2008 - 31.08.2008 C. C. Wu Building, 302-308, Hennessy Rd
展覽入面，印象最深既係 Ranee K 有關回憶既展品。 好記得提到既 長者福蔭大使培訓計劃，入面其中有一個 project， 係利用影像媒體，將長者一些難忘回憶，重新建立出黎， 令到長者能夠再次重溫昔日種種。 能夠利用自已既技能去幫助到人，我覺得好有意義， 好希望，有朝一日，我都有咁既能力去幫人。
最近睇到新聞，好多意外，好多不幸。 死亡，對每個人黎講都有唔同意義， 生老病死，係每個人必經既經歷， 人為什麼生存？我無咩點去諗， 可能人生存既意義，就系去尋找生存既意義。 不過，我而家知道，要盡力做到就算這一刻要離開， 亦要無遺撼，活在當下，要珍惜身邊一切。 8月29日 再見螢火蟲今晚跑步，經過草叢， 見到一隻螢火蟲，一閃即逝。 幾多年無見過螢火蟲呢？ 以前好鐘意去水霸睇螢火蟲。 但依幾年，一直唔想再去。 好多人同事，應該留響過去。
最近心境有些轉變， 雖然唔可以講己經走出困境， 但己經唔再轉牛角尖。 回想依幾年，究竟做咩呀， 連自已係一個點既人都唔記得左， 以為自已睇化，到頭來，只不過係逃避既借口。 最近，才真正明白到， 如果連自已都唔愛，又點有資格去愛人依個簡單既道理。 好好笑，拍過咁多次拖，原來自已對愛並不了解。
今個月，書架又多帶好多書， 鈍感力 ~ 渡邊淳一 封神記 ~ 黃易 圖解周易 ~ 王春永 香港風格3 ~胡恩威 仲有大量雜誌。 而家連書架都爆晒，要將 D書放響地下， 間房成個垃圾堆咁。
十一月尾會去京都七日， 一波幾十截，終於搞掂曬機票酒店。 有幾個地方，近年好想去， 西藏，四川，京都， 希望下年可以完成埋西藏同四川兩個心願啦。 8月24日 船河。櫻花。機械人上星期日，舊同學搞船河。 其實我唔識水，又唔鐘意曬黑， 但見咁耐無見，所以答應左。 之後先記得自己好多年無落過水， 連泳褲都唔見埋。 當日一大一細船出海，曬死人。 好多人為錯誤，有人放飛機，有人遲大到。 搞到只係夠時間落下一次水，真系本都蝕埋。 自己都好多年無玩過，差 D 水都唔識起。 返到屋企，成個人曬到紅晒，成隻燒乳豬咁。 第二朝起身仲好似週身散晒咁。
* 星期四，有幸去聽 黃貴權 醫生既攝影講座。 睇見黃醫生將攝影昇華到藝術，將意、景、情融入照片， 令人目瞪口呆。
而係黃醫生講到影櫻花時，引用一位日本畫家既散文， 大意是， 『櫻花最美的時候，就是她散落的時候。
聽到以上說話，非常震撼，當頭棒喝一樣。 不禁反問，係咪因為自已既畏縮，而錯過好多機會呢？
* 岩岩睇完『我的機械人女友』， 唔理劇情合唔合邏輯，但套戲真係好好睇， 好值得入場睇。
結尾時，片段令我諗起依首歌。 妳能感受到我的心嗎？
8月9日 溫柔
收工搾車出去，播住依首歌， 聽完一次又一次。
如果有一天，妳要離開我， 我不會強求，亦不會挽留， 我不是放棄，亦不是爭取， 只因為… 這是我能給妳的最大溫柔， 妳有權選擇適合妳的自由， 對於妳的選擇我只能接受， 只因為…
影友(同事)出左 backpay，今晚請大家食飯。 今晚無飲酒，只因自已既腕管總合症好似越黎越嚴重。 右手越黎越痛，打半日野就己經卑到不得了。 而家日日做物理治療，訓果時仲要帶住個手架。
最近，發現還有很多事情要學習， 學習對每個人真誠以待， 學習把每件事都做得完美， 學習對身邊一切心存感激。 學習認識自已的優點， 學習接受自已的缺點。 學習面對自我。
以前，認為這刻所愛的女人，就是自已的一切原則， 可惜自已堅持的原則，亦會因感情而改變。 到最後，原則沒有了，自我沒有了， 變得不像自已，什麼都不是。 再不懂自已做的是對是錯，方向失去了， 連信心亦失去。
最近電視有套講寵物既電視劇。 現代感情多變，不穩定，不可靠，對於人更加無信心。 可能，在城市人身邊，再找不到簡單的感情。 城市人，都喜歡寵物，因為感情簡單直接， 正好填補空虛與蒼白，對寵物有所寶望，希望有積極回應， 從中建立感情。令人心靈上除了工作外， 發洩多餘的情感，時間更有所寄託。
可能，我們亦都知道，對於人， 凡付出過感情，往往仍是以傷心作結尾。 8月4日 BB 床今日頭痛左一日，人老啦，唔可以訓太多， 一到十點都唔落床，個頭就會好痛。 無所事事響屋企，執下房，睇下書。 有鋪買書引，買埋買埋好多都未睇晒， 咩書都有興趣，小說，散文，公仔書…乜都想睇。 不過對果種投資經濟既工具書，就避而遠之。 性格係咁，我都無辦法。 如果唔係，都唔會搞到投資失利，輸身家啦。哈
夜晚同 R 公子去 Chicco 買左張 BB 床， 將床係我送比佢地將出世 BB 既禮物。 本來我響荷花親子睇中另一張， 但佢地為我銀包著想，都係買依張算。 不過都唔平架，嗚…我今個月又要節衣縮食啦， 如果唔係年尾無得去旅行， 不過最緊要都係大家開心，錢總要花。 8月2日 紅豆冰。白糖糕好耐無去過廣城食野，而家真係好多人。 舊式手做刨冰紅豆冰， 紅豆好沙，刨冰粒同紅豆搞混，唔會太甜膩。
每次去深水步，總會去劉森記食碗麵， 之後行去坤記買件白糖糕。 細細個己經好鐘意食白糖糕， 以前住屋村，會有個呀伯上樓賣白糖糕、豆腐花， 每日總會嘍呀媽買比我食。 咬住舊白糖糕，就好似咬住舊雲咁，香香甜甜。
你話好好味，其實只可以講係合格、應該。 紅豆冰本來就應該有紅豆味， 白糖糕本來就唔應該有酸味、少甜。 可惜，小時侯既味道漸漸消失。
響依個急速既社會，有時停一停，望一望， 會發覺身邊事物己經響不知不覺中消失， 想再找呢，己經無法再尋回。 7月31日 你個腦裝乜？好好笑測名， 打自已中文名落去，就會 show 你個腦裝乜。 http://maker.usoko.net/nounai/ 基本是解釋如下: 疲 = 發懶的頻率頗高，工作上也超累
唔洗認真，當笑話玩下。 我個腦，裝咁多秘密做咩？！
7月18日 倔強。知足朋友話我好奈弱，比左首 『倔強』我聽。
係，我個人其實好怕醜，做野無乜勇氣。 每晚跑步，當聽到依首歌，總會有毛管棟既感覺。 心入面果團己經熄滅左既火，又慢慢重燃起黎。
我 如果對自己妥協 如果對自己說謊
依幾年，總在逃避，講得好聽就叫睇化， 其實就係比借口自已，沉左咁耐， 知道唔可以再搵借口去逃避。
我和我最後的倔強 握緊雙手絕對不放
其實好佩服朋友果鼓向前衝既既勇氣， 其實唔肯去試，唔肯去做，永遠都唔會成功， 但自已總唔敢踏出果一步， 我諗，我要好好學習。 * 另一首跑步聽既歌，『知足』。 每次聽到，總覺得自已響天空上飛翔，海上浮沉。
怎麼去擁有 一道彩虹
從前，太過著結果，當失敗果時， 往往就會轉入牛角尖。 好怕果種絕望既感覺，慢慢就迫自已化， 學識只要唔好太投入、唔放太多希望， 就唔會絕望。其實，生老病死，悲歡離合， 亦只不過人生必經過程，我地又點可以捉得緊，留得住。
如果我愛上 你的笑容 要怎麼收藏 要怎麼擁有
其實，放響手心，並不算是擁有， 埋在心裡，才能長久。 7月3日 我愛港女我其實都幾憤世疾俗。
睇到一篇 香港正妹 http://blog.yam.com/airsama/article/15788798 睇完有d 苦笑，因為入面，的確出現響現實生活中， 不過輕鬆咁睇，又真係幾好笑。 其他人既回應先底死，個板主又好心機個個都回應， 仲要盡量控制大家唔好引起罵戰。
其實個板主都係咁講見到既只係部份人，唔代表全部人， 不過一用『港女』依個字，就好易觸碰到某d 人既神經， 之後引起筆戰。其實輕鬆 d 睇，唔洗咁緊張。 放鬆 d 啦香港人。
『港女』比人話質數底，要求高， 其實要求高好正常，而家男女平等， 女性地位更加越來越高，唔似以前，仲要倚靠男人。 當自已經濟以至心態都獨立，好自然就對感情追求更高既要求。
至於質數底，係咪真係底呢？ 衣著問題，而家後生依代，好多都缺忽獨立思考能力， 講得難聽 D ，就係唔會用腦諗野。 其實都係社會風氣、教育問題， 近十年，香港教育比教統局(為而家叫教育局)搞到爛晒， 平時讀既玩既，都唔係以自我修養為中心。 大家變得盲目地追隨潮流，見雜誌點著，就跟住著， 又無認知咩係式合自已，有乜辦法唔個個一樣。
至於身材問題，你睇日本台灣既型容風氣幾盛， 雖然最近香港有公司大肆宣傳整容，但不被大眾接受。 香港雖然女仔身材上係比較輪蝕， 但勝在真材實料，無添加，夠自然。
而化妝.... 其實我唔太鐘意人化得好勁， 好彩普遍香港女仔都係化淡妝多， 但眼見近年，越細既小妹妹就越化得勁， 勁都眼耳口鼻都係畫上去咁，非常俗氣，睇見都心驚。
至於拜金，又係社會風氣問題，當你身邊一切雜誌傳媒， 全部都教你點去買野點去享受，接觸得多， 久而久之人就習慣，自然變得越來越功利。 人有我有既心態，人之常情。
最近發覺，傳媒好鐘意將所有唔好既野合理化， 購物合理化，咭數合理化，賭錢合理化，性開放合理化， 將所有問題既野，慢慢講到大家習慣，等大家覺得無問題。 其實係咪個個都拜金呢？如果對方係拜金既，點解你又癡埋去？ 自已唔識選擇朋友？ 好彩，自已身邊既朋友唔係咁。
走路非常快、黑口黑面… 真係無法，香港生活節奏真係好緊張， 行慢 d 真係怕比人撞死。 而黑口黑面，其實只不過係自我保護， 街上面，壞人當道，實實在在太多賤賤格格既人。 人與人既關係，更加變成多一事不如少一事， 慢慢我地習慣冷莫咁面對身邊既一切。 成日響度諗，上到公共交通工具， 總見大家唔係講電話、睇書、聽歌..... 總之就要搵 d 野做，其實大家係真係想講野呀？ 定係怕寂寞？還是怕響一個咁既共交空間入面， 如果無野做，唔知點好呢？
香港女人，其實唔係唔溫柔，好多外面對人惡到死既女人， 響自已戀人面前係可以溫柔到殺死你。 雖然女人要求會高 D ，有時會發下皮氣， 而就算係嬌爹中都係會帶點兇惡， 但唔知點解，我仲係愛港女依種特色， 可能係香港女人既惡死、難服侍，真係世上少有。嘻 6月27日 腕管綜合症最近，手腕手指經常痛，隻手仲會麻痺。 其實，以前都會有咁既情況，有時嚴重到手指都屈唔到， 不過果時我會去荃灣搵何醫師幫我拮幾針， 包保針到病除。但係近年何醫師實在太忙， 好難約到時間。
同事見我痛左咁耐，按排左個快期比我睇職業治療， 仲按排佢地個靚女治療師幫我做測試。 測試結果，我有腕管綜合症， 我諗同長期用 mouse，坐既姿勢又唔多好有關。 其實，放假唔多用電腦，隻手真係好少痛。 而家要 keep 住做治療，三個星期後再睇。
* FRANZ ACKERMANN：重‧來 Opening: Saturday 5 July, 6:30 pm Exhibition: 6 July 2008 to 3 August 2008 Artist's Talk: Wednesday 2 July, 6:30 pm to 8:30 pm at Room 1907AB at the Hong Kong Art School, Learning Centre, Hopewell Centre, Wan Chai; RSVP essential to info@para-site.org.hk
6月24日 打風打死隻曱甴本來定左今個星期約好晒屋企人去澳門玩， 點知佢地又改左今日去，結果我都係去唔成， 我諗我同澳門都係無緣。
打三號風，但就無乜風，食飽飯坐晒度睇電視， 突然見到隻大曱甴，慢慢響我面前走過去呀妹間房。 嚇死我，我唔驚蛇蟲鼠蟻， 但由細到大只係驚曱甴。 試過有次有隻曱甴走左去我間房之後唔見左， 嚇到我果晚唔敢返屋企訓，噴完殺蟲水之後就離家出走， 最後要晌車過一晚。
講返隻曱甴，睇住佢入左呀妹房， 拿拿林拎支殺蟲水係咁噴係咁噴。 噴完關左房門，再響門剌再噴， 噴到成間屋都好臭，自已都有 d 頂唔順要去跑步。 跑完一個鐘返黎，一手拎住拖鞋，一手拎住殺蟲水， 如臨大敵，慢慢打開房門， 一開燈就發現隻曱甴反左肚死左響度， 地下仲成地都係殺蟲水。 好懷疑隻曱甴唔係比殺蟲水毒死， 而係浸死既。
而家打八號風， 聽日唔知幾點落，又唔知幾點返工， 真係煩。 6月21日 藍天白雲落左咁多日雨，終於見到藍天白雲。 今日公司無乜野做，臨收工行出露台影幾張相， 如果夜少少影，應該仲靚， 下次帶埋腳架上天台長曝試下。
夜晚，大頭生日，出左六樓飲野， 咁岩老細隊 band 開show，咁又玩左一晚。
仍然懷念以前同 R 公子果段瘋狂日子， 但人大左，責任唔同左，好多野變左， 唔可以好似以前咁癲。 6月20日 談分手以為愛得越深，恨亦要越深， 互相傷害，你插我一刀，我插你一刀， 結果比對方見到自已最醜惡最陰暗既一面， 日後令大家後悔曾經跟對方發生過關係。
無論誰對誰錯，但曾經相愛， 分手，何必分得太爛，好頭好尾， 應該都留返個美好印象對方。
最近有朋友面臨分手， 其實，我唔識點去安慰人。 我當然想身邊既朋友，個個天長地久百頭到老， 但遇到依類不幸既事， 真係唔知可以講咩說話令佢地好過點。 我覺得，當對方心煩意亂，失去理智， 歇思底理，情緒激動… 講咩都唔入耳， 所以幫唔到咩忙。 可以做既，只係可以默默支持， 同對方講，仲有朋友"燦"住。
幾時都覺得，傷心果時，就應該盡情傷心， 將這份心痛既感覺，完全發洩出黎。 屈住屈住仲唔好，好易屈到變情緒病， 開心笑傷心喊，係正常不過。 發洩完，接受左現實，自自然然會醒。 叫人睇開D，東家唔打打西家… 多餘，一對情侶，只要有一方係認真， 最後到分手，傷心係必然。 越愛得深，痛亦越深。
我地無辦法去控制自已愛上一個人， 同樣亦無辦法去控制自已唔去愛一個人。 果個人離開左，傷心當然都係唔可以控制。 對方可能問，點解某某可以天長地久，而自已要接受不幸。 其實無人答到，正如生老病死天災人禍一樣， 唔會有一個答案可以滿足到傷心人。
我地應該興幸，原來晌人生之中， 能夠遇過一個令自已咁傷心既人， 比我地記得自已曾經有個一份咁深既感情記錄。 如果一生中，感情無風無浪， 無起無跌，原全無起伏，係你要咁既愛情咩？ 一段感情，應該好好享受過程， 人生沖沖幾十年，好多野都係過眼雲煙， 愛過痛過笑過哭過仲唔夠？ 何必太執著於結果。 輸又點？贏又點，幾十年幾百年之後？ 又會有邊個在意呢？ 6月18日 談愛情雨，一直下， 雨，總是給人一種惆悵的感覺， 使情緒特別低落，看到什麼，就討厭什麼。
愛情，對大多數人來說，己經是生活的一部份。 被愛，就像吸毒一樣，對愛要求越來越高，越黎越依賴對方。 有時，對方滿足不到自已，會感到感情空虛，會寂寞，會孤獨， 就好似毒癮發作，不能自拔。
我們希望愛上別人，更渴望被愛， 人，只不過是感情的動物， 在某個時間，某個地方，愛上某個人。 有時，我們會為天長地久，而力求完美， 有時，亦會為了追求新鮮，將關係破壞。 講愛情，其實並無分對與錯， 有人選擇前者，有人選擇後者。 對與錯，最後面對的並非別人，而是自已。 年青時追求激情，身心俱疲時追求安穩。 不同的人生階段、生活、環境、心態、體驗， 使我們有不同的愛情選擇。
多久沒談戀愛？沒有戀愛的感覺？ 由於戀愛感覺狀態，長期處於底水平， 最近出現感情閉塞的症狀。 身體缺乏運動，會影響身體健康， 缺乏愛情，感情亦不會健康。
曾經以為自已對愛情扁執，情願寧缺勿濫， 不是沒人要，是等待真命出現而選擇獨身。 最近發覺，原來自已是害怕，害怕這份希望，拒絕認識。 這幾年來，感情上，只能找到點沒找到線， 經驗亦令自已變得更加負面。
從體驗得到的結論，無論開始時對方如何迷戀， 大家難以自拔，但熱情終有一天會淡去和消失， 亦再不能為雙方帶來刺激興奮的感受， 最後，對方甚至不想再對著自已， 關係一開始，總是朝結束的方向前進。 對於感情，曾經用過唔少錯誤既方法黎捕捉， 最後發覺，錯既唔係目標，而係方法。 6月14日 無人父親節星期六放假無所事事， 結果出行灣仔華南食碗腸腩米，再隨便行下。
見時間仲早，又停左雨，坐車落佐敦。 一直都好想去睇下渡船街果八座大廈， 每次坐車經過，都覺得好特別。 好想搵晚去果度影下黑白夜景。
屋企人返晒大陸，結果都係食自已。 是日晚餐：煎牛扒，豉油蝦，西蘭花，酒一支。
牛，煎得太熟， 豉油蝦，第一次試整，失敗左。 。 父親節，但屋企人仲未返， 今晚果餐都係自已整。 煮左個龍利魚柳，蝦仁炒蛋同埋蒜蓉包。 由細到大都唔識煮魚，今次都無倒外，好難食。 訂左下星期同屋企人去澳門玩， 其實咁大個人，只係去過澳門一次，仲要係做野。 以前有女友，次次 plan 去澳門，唔係打風就係水浸， 近年都係單身，更加無諗過去澳門。 6月12日 一個人被問，我係咪好鐘意一個人週圍去。 經常見我睇展覽，去影相，都係一個人去。 其實，無人鐘意孤單一個。 但係要搵到志氣相投既朋友一齊活動，好難。 有時話不投機，左就右就，不歡而散。 所以到最後都情願選擇一個人去。
對於感情，都係一樣，何必退左求次。 晌講求速度既年代，有唔少人，太易對人有感覺， 晌一次創傷未完，又會再為自已製造另一次創傷。 無條件既愛，唔係可以開放比任何人。
日常生活上，好多時會令我地去反醒一段關係， 感情問題，最緊要係先問自已想要咩？要得到咩結果？ 愛同唔愛都搞唔清楚，點盡力做都無用。 一段長久既關係，一定唔會無風無浪。 無風無浪，亦都唔會係我地所追求既關係。 天長地久，個個都想，但可遇不可求， 好睇雙放共同努力，步伐、目標一致， 更加要無限既忍耐包容。 6月10日 海闊天空六月十日， 十五年前，當時天氣好悶熱， 我正因為會考而埋頭苦背， 收音機不斷放住家駒既歌， 佢死時，只係得三十一歲。
當時 Beyond 既碟，我係會花錢去買。 還記得第一次聽佢地演唱會唱碟， 果份令我動容。
當今樂壇，己變成娛樂圈。 經過九十、千曦年代，流行曲流於煽情，重於愛情K歌， 我更加懷念七十既黃霑、盧國沾果份正氣俠義。 我好尊敬家駒既音樂，我並唔係話佢果份沙啞既聲線、 出神入化既結他、音樂才華。 令我尊敬既係，佢既音樂背得意思。 果份胸懷大志，關懷世界、 果份悲天憫人、敢言既勇氣同氣魄。
就算到而家，聽住當時 Beyond 歌， 都會比到我一份勇往直前既勇氣。
|
|
|
