Edmund's profile讓自已的故事從頭開始PhotosBlogListsMore  |  Tools Help |
|
November 03 六月東京豬旅 Day 4Day 4： 2009-06-26 新宿 > 上野公園 > 東京國立博物館 > 法隆寺寶物館 > 呀美橫町 > 成田空港
今日就要返香港，為了避開朝早恐怖既返工人潮， 響酒店食完早餐之後，我地就一早 check-out，坐 JR 到上野。
新宿 -> 京成上野 所要時間：24分 (乗車時間：24分) 乗換回数：0 回，総額：190円，距離：13.5km ■新宿 ｜ ＪＲ 山手線池袋方面行 13.5km ｜ 190円 ■上野
好欣賞日本人坐交通工具既態度，大家都好靜，唔會大聲講野、講電話、 迫途人聽自己既私隱，唔知香港有無可能學到。
從 JR上野駅出，我地將行李放響私鐵 京成上野駅，之後就漫步到上野公園。 公園內充滿著悠閑的氣氛，可能時間還早，四週都很寧靜。
公園除左見到好多忙住返工既上班族，唔難發現，週圍仲充斥著好多流浪漢。 同匆匆既上班族，型成一種唔協調既感覺。隨著都市發展，貧富懸殊，失業增加， 一班失去競爭力既上班族，由於受長期既『恥文化』影響，慢慢變成流浪人。
等到九時半，終於到『東京國立博物館』開館的時間。 經過關東大地震同二次大戰，『東京國立博物館』主館是由 渡邊仁 設計重建， 亦係現時日本最大既美術博物館。
整座國立博物館，經常會見到巴洛克風格燈飾、窗格，而牆壁就充滿浮雕花飾， 而地下就用上米色馬賽克地磚。
離開主館，仲夠時間參觀 谷口吉生 設計既『法隆寺寶物館』。 館內收藏左日本最古老寺院『法隆寺』三百幾件珍寶。
離開法隆寺寶物館，時間仲早，我們就沿公園小路，行返去『呀美橫町』買手信。 途中仲比我試到部其待以久既 Olympus 既 E-P1，其實去左日本幾日， 晚晚都有去行下相機店，目的就係想試下依部機。 講真，去幾次旅行，次次都拎住咁大部單反，上天落海幾十磅，你都唔好話唔金！ 而家有部咁細，而質數都有返咁上下既相機，爽。
吃完午飯我地就返 京成上野 拎返行李。 京成上野有架火車直到成田空港，當然，速度緊系無三千￥既 N'EX快啦。 但勝在只須一程車，仲要只係一千￥。
京成上野 -> 成田空港 所要時間：1時間16分 (乗車時間：1時間16分) 乗換回数：0 回，総額：1,000円，距離：69.3km ■京成上野 ｜ 私鉄 京成本線特急(成田空港行) 69.3km ●成田空港
四日既東京行程，亦都要結束。 比起上次張京都，東京既感覺好唔同。 東京生活實在太急速，我地仲要住響市中心既新宿，朝朝都見都好匆忙既人潮， 慢慢就會感受到一股無形壓迫感。 六月東京豬旅 Day 3Day 3： 2009-06-15 新宿 > 橫濱桜木町 > Y150 起始的森林 > 横浜開港物語 > 磚倉庫會場 > 大棧橋會場 > NISSAN Y150夢想特區 > Y150明日園 未来シアター「BATON」
今日又係一早就出門去橫濱桜木町，而去橫濱的目的， 就是參加記念橫濱開港 150週年的『橫濱Y150開國博』。 雖然一早就出門，但就好底能，坐火車坐錯方向，仲要去左好遠先發覺。
新宿 > 横浜 > 桜木町 ■新宿 1番線発 ｜ ＪＲ 湘南新宿ライン快速(国府津行) 32.6km 前～後 ◇横浜 [7分待ち] 9番線着/3番線発 ｜ ＪＲ 根岸線(大船行) 2.0km ■桜木町
幾經辛苦終於落車，經行人天橋行去桜木町對面既 『Yokohama Landmark Tower』， 仲有架免費穿梭巴士來往主要會場。
十九世紀時期，為左配合當時既明治維新政策，1859年7月1日， 日本政府開放橫濱港口作外國通商之用。由於發展迅速，大量外國人來到橫濱定居， 大量引入西方建築、文化，形成橫濱市揉合了同洋共處的特式。
我個首先到『Y150 起始的森林』， 欣賞法國藝術團體 La Machine 既巨大機械蜘蛛劇團「ENEOS ラ・マシン」， 因為蜘蛛劇團一日只會演出五場，如果錯過了，就要等多一小時。
睇完二十分鐘表演之後，就順路去睇下介紹橫濱港歷史既『橫濱物語』展館。 之後就再去已變成橫濱地標既『紅磚倉庫』，依個系大正時代既磚造歷史建築物。
紅磚倉庫，係以舊式紅磚貨倉改建成商場，無論內外，都盡量保持舊貌。 好希望香港政府可以學習一下！保育、重建、活化，係必須要保留原區特色， 並唔係推倒所有舊有關系，建築一棟棟浮誇、高級既建築就代表自己系國際都會。
倉庫外形好有特色，內部被改裝成一般的紀念品店同餐廳。 響紅磚倉庫吃完中午飯，就步行去『橫濱大棧橋國際碼頭』， 大棧橋國際碼頭係由英國建築公司一手設計，地下係室內出入境大堂， 中層係大型展覽廳，天台係全天候公園，整座國際碼頭都鋪滿木地板， 而設計概念是來自郵輪甲板。
行到國際碼頭，本來係諗住去睇紙船裝置藝術展，但原來自已搞錯時間， 個藝術展己經完左，不過食飽飯，沿住海邊漫步，亦系尚心樂事。 離開大棧橋國際碼頭，咁岩又有穿梭巴到 NISSAN Y150 夢想特區。
整個『橫濱Y150開國博』其實都環遙著七個主題。 分別是：共生力，共感力，想像力，創造力，交流力，横浜力和市民力。 以七個主題，帶出『地球の希望』愛護地球既信息， 可惜其實七個場館，仲有一半未開， 到我們最後只能參觀共生力，共感力，想像力，交流力等展區。
『NISSAN Y150夢想特區』分三個展區， 首先係 154吋巨型高清劇場，響高清熒幕前，展示自然既美境。 之後中間展區，係展覽日產未來電車『PIVO 2』， 希望令用電池驅動既電車，黎關懷環境保護。
再透過膠管吸進許願大膠球裡。
離開夢想特區之後，就返 『Y150 明日園』等睇動畫短片『未来シアター「BATON」』。 入到去先發覺係全日文，無字幕既，結果睇睇下，唔知佢講咩，係咁就訓著左。 本來好想等到夜晚，再睇短片『HOME』， 之後再去橫濱最高既 Yokohama Landmark Tower 影夜景， 但一來天氣真係麻麻，夜景應該無野睇頭，二來己經行左兩日， 體力實在用盡，只好早D 返新宿休息。
返到新宿，見時間仲早，就隨便行下。
記念品數份。
六月東京豬旅 Day 2Day 2： 2009-06-24 新宿 > 三鷹の森ジブリ美術館 > 調布鬼太郎茶屋 > 東京駅 B1F東京駅一番街 > 六本木 Tokyo Midtown Fujifilm Square > 21_21 > 六本木之丘 Sky Deck > 森美術館 > Hills City View
第二日起身，本來諗住一早先去吉祥寺，之後從 井の頭恩賜公園 漫步返去三鷹， 可惜天公不做美，一早就落著大雨，只好放棄啦。 結果都系訓多一陣，響酒店入面既餐廳食個早餐，之後就出發， 去花倫今次去日本既主要目的『三鷹の森ジブリ美術館』。
新宿 -> 三鷹 所要時間：14分 (乗車時間：14分)，乗換回数：0 回 総額：210円，距離：12.2km ■新宿 12番線発 ｜ ＪＲ 中央線快速(青梅行) 12.2km 不要搭到中央總武線因為站站停 ■三鷹
響三鷹駅南口出，本來諗住沿 風の散步道 行到美術館， 但個天仲係落著雨，我地只好響三鷹車站坐三鷹 City Bus到第四個站美術館落車。 落車後，離遠就己經看見館內台既『天空の城守護神ロボット兵』。
見仲未夠時間入館，先到館外附近參觀一下。
但展品就好豐富，因為每段開放參觀時間只得兩個鐘，時間只能說剛剛夠。 而入場門票，更加唔會現場售賣，我們既門票，就要響香港既日航天地預先買定。 好可惜，入面係唔比影相既，亦正因為唔比影相，咁就可以令我地更加投入去參觀展品。 而家去好多展覽，發覺大家都拎住相機影影影，往往就忘記左展覽本來既義意。
三鷹の森ジブリ美術館 開館時間１０時～１８時， 181-0013 東京都三鷹市下連雀1丁目1-83(都立井の頭恩賜公園西園内) 沿風の散步道步行到三鷹駅南口
三鷹 -> 調布 離開三鷹美術館，就響美術館巴士站前，有一個叫明星學園既巴士站， 響果道，我地坐一架『吉4』既巴士到『深大寺入口』落車。
就會到達目的地『鬼太郎茶屋』。 行行下，發覺我地應該早左個站落車， 因為行左超過十幾分鐘都未搵到茶屋，但沿路既景色又真係唔錯。
到最後，都係要搵人問路，原來我來錯過左一段小路，好彩唔係行過左好多。 上年尾去京都既時候，其實都計劃過去 境港 既鬼太郎村參觀，不過最後都係因為太遠， 交通太唔放便而放棄，好彩咁岩知道深大寺有一間鬼太郎茶屋，距離三鷹先十五分鐘車程， 當係去不到境港既補償啦！茶屋內內外外都充滿鬼太郎主題， 雖然無境港這樣多銅石像，但總好過無！
門口放左架 Van 仔。
無境港既鬼太郎銅像，只得主角紙板公仔！
班大茄反而有大公仔
雖然買左唔少野，但好後悔厭佢大盒，無買佢返黎，嗚嗚嗚。
鬼太郎茶屋 「深大寺入口」or 「深大寺小学校」落車行5分鐘。 AM10：00～PM5：00，182-0017 東京都調布市深大寺元町5-12-8 ※深大寺門前
中午，停晒雨，離開茶屋都開始感覺肚餓， 見去到深大寺，緊要食碗出名既橋麥麵。
食完深大寺出名既橋麥麵後，我們就再坐『吉4』巴士返吉祥寺，之後轉乘 JR 到東京駅。 去東京駅既目的，本來係希望參觀一下『舊東京火車駅』，不過到達先知道， 舊車站現正重建，結果我地響『東京駅一番街』大出血買玩具， 之後就去下一個目的地 ~ 六本木。
吉祥寺 -> 東京 所要時間：29分 (乗車時間：29分)， 乗換回数：0 回，総額：380円，距離：22.5km ■吉祥寺 ｜ ＪＲ 中央線快速(東京行) 22.5km ■東京 1番線着
東京 -> 六本木 所要時間：18分 (乗車時間：10分) ，乗換回数：1 回，総額：160円，距離：4.9km ■東京 1番線発 ｜ 地下鉄 東京メトロ丸ノ内線(荻窪行) 2.1km 前／1号車 ◇霞ヶ関 [8分待ち] 1番線着/3番線発 ｜ 地下鉄 東京メトロ日比谷線(中目黒行) 2.8km ■六本木 1番線着，日比谷線「六本木駅」4a出口徒歩5分地下通路直達
從東京駅坐 Metro，由『霞ヶ関』轉車到六本木。再行五分鐘，就見會見到 Tokyo Midtown。 響Midtown旁邊，就係 Fujifilm Square，係日本 Fujifilm 既展覽館， 地下，設有定期更換攝影主題既『Photo Is』，對我依個展覽痴，當然唔會錯過。 當日就參觀了一個 『A Panoramic View of Japan from Above 』的飛行攝影展覽。 全部相是以 1000mm 鏡頭影空中拍攝。
二樓既一邊是 Fujifilm既歷史長廊『Fujifilm Photo Museum』， 展出 Fujifilm由十九世紀到而家既重要產品，真係好想將全部帶返屋企！！
而另一邊就係展覽日本各地名家作品的『Fujifilm Photo Salon』， 離開Fujifilm Square，我地再沿花園漫步去 21_21。
FUJIFILM SQUARE 10:00 - 19:00
『21_21 Design Sight』， 設計師 三宅一生 以一枚之布日本和服美學意識， 將一塊鐵板如折紙般折下作為屋頂。 再加上建築師 安藤忠雄 將大部份空間埋響地底之下， 主張不破壞周邊自然環境，一貫佢與大自然共存共生的理念。
而掛著響牆上既立體 LOGO：21_21，就係由平面設計師 佐藤卓 設計。
其實附近仲有好多地方想去，但時間真係唔夠，希望日落前去到 六本木 Hills City View， 又要返去六本木之丘啦，都未看到 Mori Tower，就先注意到Louise Bourgeois 設計的 MAMAN。
購票後再上五十二樓的 Tokyo City View。
到達五十二樓，我地先去去『森美術館』睇主題展覽， 然後落返森美術館電梯前，左手面有就有個升降機上 Sky Deck。
森美術館 東京都港區六本木6-10-1， 六本木新城森大廈 53F， Tel：03-5777-8600，普通票￥1,500 週一‧三～週日10：00～22：00
Sky Deck 其實是 Mori Tower 既直升機場，佢地開放左部份地方比遊客參觀， 響 Sky Deck上可以 以 360 度無玻璃阻隔既情況下欣賞東京的風景。 可惜因為安全問題，除了相機之外，所有除身物品都不能帶上去，腳架更加不可以啦！ 雖然早上落左一場大雨，但天氣仍然唔好，個天好似有層灰阻隔一樣。
東面，東京鐵塔。 東南面，台場及彩虹大橋。 西面，西新宿超高大樓群。
Sky Deck 六本木 Hills City View 門票 再加 ￥600 10:00~20:00 (最遲 19:30 入)。
但因為有玻璃阻隔，響 Sky Deck看過東京夜景後，Tokyo City View 就失去吸引力了。
六本木 Hills City View 10:00 - 23:00
六本木 -> 新宿 乗換回数：1 回，総額：190円，距離：8.6km ■六本木 2番線発 ｜ 地下鉄 東京メトロ日比谷線(北越谷行) 2.8km 6・7号車 ◇霞ヶ関 [5分待ち] 4番線着/1番線発 ｜ 地下鉄 東京メトロ丸ノ内線(荻窪行) 5.8km ■新宿 1番線着
返到酒店數下今日戰利品，發覺九成唔系我既。呵，大出血！！！
六月東京豬旅 Day 1距離上次關西之旅，才過了半年，想唔到咁快，我跟花輪同學就再度出發，踏上關東之旅。 計一計，今次系我同花輪第三次旅行，上年十一月既京都，三月既曼谷。 經驗雖然唔很好豐富，但至少都做足研究。
唔以夠講說自己好鐘意日本，但日本人對自己文化既專重、歷史既保存態度， 確確實實吸引著我。 就咁，我們又再度踏足日本。
四天行程如下： Day 1： 2009-06-23 香港 > 成田 > 新宿 Day 2： 2009-06-24 新宿 > 三鷹 > 調布 > 東京駅 > 六本木 > 新宿 Day 3： 2009-06-25 新宿 > 橫濱 > 新宿 Day 4： 2009-06-26 新宿 > 上野 > 成田 > 香港
Day 1: 2009-06-23 香港機場 > 成田機場 > Suica & N'EX > 新宿 > 京王酒店 > 思い出橫丁 > Yodobashi > 東京都廳北展望室
跟預定落機既時間差唔多，大約 16:00 著陸，好有機會可以趕上 16:48 開出既 N’EX。 離開入境大堂，先去 JR 既購票櫃台換了Suica & N'EX套票。
依張套票己經包括一張 Narita Express指定特急席車票，和一張已儲值1500￥既 Suica。 用 Narita Express，就可以用超值價錢乘坐 N’EX火車 到新宿。 而 Suica 咭就同香港既八達通差不多，可以省去每次買票既時間， 而背後的浮世繪圖案更加是機場限定版，只限外國人購買。
月台一角。
N’EX 同普通火車係用同一個月台，要睇清楚，唔好上錯車。
指定值，唔洗同人迫，舒服又快，四十五分鐘就由成田空港直到新宿。
從新宿站落車，徒步行 5 分鐘就到 新宿京王飯店。 京王感覺唔錯，房間好大又乾淨，沿路仲有自動電梯直到 JR 西口， 不過就只有辦工時間開放，以我地早出晚歸既性格，應該都系無福消受。
京王酒店 東京都新宿区西新宿2-2-1， Tel. 03-3344-0111
離開飯店，原來己經日落，我地先行去『思い出橫丁』， 去感受一下依個仍保留六七十年代平民氣息的新宿食店街。 食店大多以屋台式經營，以傳統居酒屋及燒物之主。 香港己經無晒屬於自已文化既小食街啦，我諗過到幾年， 我地既生活只會得返大型超市、大型餐飲連鎖店、同一式一樣既大型商場啦。
離開思い出橫丁之後，行過對面就系出名既『歌舞技町』。 好多人響街拉客，唔敢行太入，只響外圍行個圈，隨便搵間拉麵店做晚餐算。
拉麵始終係日本食好味 D。食完個麵，都見倦。我地就行返去京王飯店對面既東京都廳， 因為東京都廳頂樓有南北展望室，而更加重要既系免費，而北展望室仲開放到十一點！！ 去到北展望都十點幾，好彩岩岩入得切最後既進場參觀時間。
東京都廳，系設計師 丹下健三 以『折衷主義』設計，頂部天主教堂式高塔， 外牆以江戶式窗格，底層羅馬式廣場。雖然有人認為『折衷主義』過於保守， 令到『現代主義』退步，未能脫離歷史風格模式，但唔能否認， 『折衷主義』能夠容易地融入地方性色彩，將風土建築同高級、現代風格之間融合。
從北展望室，可以睇到由設計師 丹下健三 設計的 ParkTower。 而在另一面就可以睇到新宿樓群同東京鐵塔。
其實南展望室既視野比較好，如果好天，仲可以睇到夕陽下既富士山 、台場、東京鐵塔， 但我地太夜去啦。而北展望室亦都望到國會議事堂、東京鐵塔。
東京都廳 南展望室，每月第 1 & 每月第 3個星期二休息，09:30-17:30。 北展望室，每月第 2 & 每月第 4個星期一休息，09:30-23:00。 April 27 雜記京都之旅後，就再無寫過野。 一來，工作好忙好忙。 二來， MSN Spaces 經過更新之後，真係煩到唔想用，放相又煩。 三來，放相果個 server 成日死 link，搞到無心機再搞。
十二月，聖誕節，整左個蛋糕比花輪， 今次整得太急，唔夠時間，雖然樣衰衰，不過又幾好味。
三月，生日。 難得一班朋友幫我做生日， 呀醬姐仲整左個生日蛋糕比我。 同我整果個比，佢果個簡直係專業水準。
三月， 本來諗住同花輪去泰國旅行，作為自已既生日禮物， 不過太急買唔到機票，結果，要三月尾先出發。 好彩早左去，如果再遲兩星期，又會撞正暴動。
六月，再出發。 February 19 京阪遊 Day 7Day 7: 2008-11-29 (六): 京都，香港 中野屋 check out → 東福寺 → 関西空港 → 香港機場
今天係響日本既最後一日，坐六點飛機，所以朝早仲有時間行下， 今天特別早起身，大約八點半拎晒所有行李就出門。 間民宿無嘢投訴，不過最唔好既地方就係要行樓梯， check-in 果日仲好好力，但 check-out 要自已由四樓拎返落地下， 拎完真係手又軟，腳又震。
去到京都駅，先將所有行李塞晒落京都駅儲物箱，之後就坐 JR 去東福寺駅。 因為用 JR關西pass，全程再唔洗排隊買票， 京都駅去東福寺駅其實只係一個站既距離，所以唔洗 2 分鐘就到。
京都駅 → 東福寺駅 → 東福寺
由火車站步行 10分鐘就會見東福寺， 剛到大門，就已經見到大一片紅楓葉，譽為京都五大寺之一既東福寺， 果然係京都觀賞紅葉既最佳觀景地。
都未行到臥雲橋，己經見到長長既人龍， 直頭就好似我地細過排隊過關返大陸一樣。
好彩當初 plan 行程己經計算過，為咗避開人潮， 大部份地方都係平日去。如果唔係， 只係諗吓『七一遊行』一樣既哲學之道， 諗到都唔想去。好可惜今日係星期六，避無可避， 所以週圍都係黎賞楓既遊客。
好辛苦先迫到入臥雲橋， 從臥雲橋上面，可以睇到對面既通天閣。
東福寺係京都五大寺院之一。 東福寺係用奈良東大寺，同興福寺入面兩個字為名。 東福寺體現了禪宗建築風格，寺內擁有日本最古老的山門， 寺內既洗玉澗、通天橋，每到秋季，便成為京都觀賞紅葉最佳觀景地。
洗玉澗
質滿晒人既通天閣
從洗玉澗溪谷仰望通天閣
返到京都先十一點，諗住反正時間差唔多， 唔想週圍走，就響京都駅搞掂。
食完飯，正想拎行李坐火車走， 但諗諗下唔對路，原來自已計錯時間， 原來係坐六點機，唔係四點機。 見仲有兩個鐘，又唔想行伊勢單，咁就響附近隨處行吓。
日日返民宿，都經過京都駅八條東出口，對面就有個商場。 不過次次我地都唔敢行隧道，怕蕩失路，所以一直都無發現。 響個商場，我仲發現到我好想買既膠相插，而頂樓又有個好大既書店。
兩點鐘，真係夠鐘走啦，響儲物箱拎返晒行李，去 30號月台坐火車。 日本火車站唔似得香港咁有咁多『車立』， 每次拉行李過長樓梯，都搞到我喘晒氣。 返関西空港都係用JR關西pass，坐HARUKA 特急はるか27号。
HARUKA 分自由席同指定席，自由席係無指定坐邊，邊道有位就坐邊度。 而指定度就係有指定坐位，當然價錢會貴 D。 全車只有一卡係自由席，所以坐靚位就先到先得。
火車離開京都，經過新大阪、天王寺，飛快到向関西空港進發， 己經到達旅程既尾聲，一幕幕片段從回憶浮現。 差唔多到達空港，仲見到彩虹，咁就當係旅程既完滿結束啦。
京都駅 → 関西空港
返到香港，步伐再次變得急速， 大家又開始爭先恐後、橫衝直撞。 『有必要咁趕嗎？』 有時感覺到，生活，其實唔係同時間比賽長短， 而係應該同自已比深淺，重質，不重量。
唔買唔買，原來都買左幾多野。 屋企、同事既零食無得走， 其他手信，大部份都係專登買比今次旅程幫過我既朋友。 對於自已黎講，禮物如果無用心買，就不如唔好買。
七日既旅程結束，出發之前，一方面充滿期待， 另一方面又好緊張，唔知會唔會唔適應。 到達京都之後，慢慢又變得習慣，之後仲來去自如。 雖然只係幾日，但到一個完全陌生既地方， 感受過完全唔同既民情風情。
旅行，唔應該只係影張相、買野， 旅行，我會視為回憶收集，旅程中既人同事， 成為記憶同感情既註腳。
下個地方要去邊呢？ 不如，再黎多個約定。
February 16 京阪遊 Day 6Day 6: 2008-11-28 (五) : 京都，嵐山
最初 Plan 行程既時候，確實好兒戲， 選擇一定去嵐山，最主要睇旅行書介紹，嵐山有架『浪漫觀光小火車』。 見到『浪漫』兩個字，我當堂雙眼發光，興起一探嵐山既念頭。 之後開始搵嵐山資料，先知嵐山上， 有好出名既三尾神護、清瀧、愛宕諗佛寺等地方。 而架觀光小火車係好著名既觀光路線， 當賞櫻花、紅葉既旺季，更加係一票難求。
小火車響 Torokko龜岡站 9:18分出發，所以我地又一早起身， 由JR京都駅坐 JR嵯峨野線去 JR馬堀駅。
到達JR馬堀駅之後，出咗車站，向左手面行， 沿鐵路行大約十分鐘就到 Torokko嵐山駅。
到達 Torokko嵐山駅都未到九點，離開車時間仲有兩十分鐘， 好少遊人，好彩附近環境都好靚。 車站鐵路邊，仲有一大隊小狸貓歡迎客人。
為咗一嚐所願，當日一落機， 就衝去関西空港 JR 綠色服務站訂咗 Torokko小火車飛先。 小火車分 Torokko嵯峨站出發，同回程 Torokko龜岡站，為咗就嵐山行程， 所以當日我地選擇買 Torokko嵯峨站出發既車票。 其實，都無得我地揀，因為果兩張票，其實係最後兩張連位票，好彩好彩。
差唔多到開車時間，月台上湧滿晒人等小火車既遊客， 鐵道員哨子一響，滿座既小火車慢慢開動。
觀光路線係沿住保津川而行，可惜我地既票係坐右邊， 大部份時間都係望山景，火車都行得幾快， 不過響 D 主要既靚位，佢都會停落黎比大家影相。 既然坐既位唔適合影相，我都係決定影少 D，靜心欣賞風景算。
嵯峨野トロッコ(Torokko)觀光小火車 時間：全程 25 分鐘 費用：￥600，星期三休息
小火車經過 Torokko 嵐山駅，大部份遊嵐山既遊客會選擇落車， 因為一出車站，就係嵐山出名既竹林之路， 北上可到常寂光寺，南可落天龍寺、渡月橋，非常方便。 不過我地都係選擇到 Torokko嵯峨嵐山駅，享受多一刻既靈靜。
Torokko 嵯峨嵐山駅 同 JR 嵯峨嵐山駅 其實響同一個地方， 外面都放咗架蒸汽火車頭做展覽。 出咗車站之後右轉沿著鐵欄行到嵯峨天龍寺北造路町， 會見到好多古老既人力車。
只要一直行、一直行、一直行…就會返出大路。 其實響車站邊，有單車出租架，￥700 一日， 如果諗住響嵐山玩成日，因為嵐山景點與景點之間，距離都幾遠， 所以租單車亦都係唔錯既選擇。 返出大路，搵到去竹林既入口，旁邊仲有小吃店， 之前一路都未病好，今日終於病好，可以試下特長四種味雪糕啦。
沿住竹林而行，去到一個分叉位， 就會見到一座簡樸既黑鳥居，果間就係野宮神社。 野宮神社係供奉交友結緣、學業進步既神社。 神社好細，但歷史悠久，早響『源氏物語』就有記錄。
野宮神社 方式： 步行
離開野宮神社，再沿竹林而行， 依條無名既竹林之路，亦係計清瀧、 鴨川之外，最鍾意既地方。 竹，總有種令人脫俗感覺，而植林之中，我最愛就係竹。
美中不足既係，可能竹林太出名，又係旺季， 簡直到處都係人，本來脫俗，都搞到有 D 俗。
行到竹林之路盡頭，向右往常寂光寺方向去， 咁岩又會經過 Torokko嵐山駅，仲見到埋站既觀光小火車。
行大約十分鐘，就到達常寂光寺，
常寂光寺靠山而建，係日蓮正宗既名寺， 亦係京都紅葉著名景點之一。 無論係正門大殿、山坡石梯，都會見到紅葉， 就好似成間寺院被紅楓樹包圍一樣。
除紅葉之外，常寂光寺，每年 2月至3月既山茶花， 3月至4月既杜鵑花和櫻花，9月中胡枝子花， 10月中既貴船菊花，一年四季都總有鮮花盛開。
常寂光寺
離開常寂光寺沿大路行返出嵯峨鎮。
出到嵯峨鎮。都到中午， 我地入左間不知名既食店，入面既 menu 連英文、圖都無， 結果我地要指手畫腳咁叫左個滑蛋炸豬扒飯同手打烏冬。 但估唔到咁好味，依餐，係我成個日本旅程入面，最好味既一餐。 其實想叫多個嵐山出名既湯豆腐，不過，太飽食唔落。。。
響嵯峨鎮大街，就見到世界文化遺產既天龍寺。 不過真係唔想再行寺院啦，正光太陽又曬，所以就響附近行吓算。
嵯峨野本身既建築，好似無乜特別， 最旺既，好似只有通向渡月橋既大街。
行到大街盡頭，就會見到大堰川上，橫跨咗一座橋，果條就系『渡月橋』， 由平安朝開始起，日本既貴族就響附近玩樂。 離遠望向渡月橋，仲可以欣賞到嵐山秋日紅葉既景色。
行完渡月橋，都無特別地方想去， 我地就返民宿休息下。
嵯峨嵐山駅 → 京都駅 方式： JR山陰本線(嵯峨野線) 時間： 19分鐘 費用： ￥230 流程： 嵯峨嵐山駅 上車，乘ＪＲ嵯峨野線到 京都駅落車
可能太早起身，唔經唔覺，訓著左。 訓醒，諗過去以夜拜紅葉出名既高台寺行下。 不過最終都係響京都駅附近行下算。
旅程既頭幾日，因為紙水高咗好多，唔太敢用錢，怕唔夠錢用， 點知原來剩落好多錢，反正係旅程既最後一晚，可以盡情買野啦。 不過京都，始終唔係購物區，想買既野唔多。
京都駅伊勢丹其實都有間手塚治虫專賣店， 響宝塚果時唔捨得買，依度可以補返數。
京都塔就響京都巴士總站對面，係京都的一個象徵。 京都塔設計上融入咗佛教寺院中常用既蠟燭同燭台造型， 據說係為咗唔想破壞京都既歷史景觀。
走上京都塔三樓，有間好大既書店， 響入面我終於搵到本香港貴到我唔捨得買既 『Cui Cui by. 川內倫子』 影集。 色調是川內倫子的招牌之一，果種淡淡既感覺，係我最鍾意既原因。 Cui Cui 係川內倫子13年既家族相簿，焦點係佢爺爺奶奶， 由爺爺生前，到爺爺病逝、到嫂嫂產子，從死亡到新生。
返落京都塔地下，就係手信店， 買畀屋企人同公司同事既零食，大半都係響依度買。 其實響京都各景點買到既零食手信，大部份都可以響度買到， 而價錢仲係一樣。 所以如果唔想拎住咁多野行街， 返京都塔補貨就得。
京都塔小子。 個做型呆過東京塔小子好多，哈。
行完街 ，食飽飯，早 D 返民宿執行李。 講下間民宿，揀佢，因為當初想訂既地方滿晒， 問左十幾間先得佢覆有房。
其實都幾驚環境會好差， 不過去到又覺得唔錯，雖然瞓榻榻米， 但又瞓得比大阪第一酒店仲舒服。 最難得距離京都駅只係十分鐘， 民宿仲係獨立單位，有玄關可以放行李同鞋， 又有獨立浴室，有得上網，仲有個小露台可以浪衫。 除左細左少少，都無乜野可以投訴。
February 05 京阪遊 Day 5Day 5: 2008-11-27 (四) : 京都，洛東、洛中
話說前一晚返到民宿己經攰到死，拎返張 CF card 出黎諗住想過相， 點知插返落電腦果時，發生一件好可怕既事…… 就係部 notebook 話張 card 無 format，要 format過， 簡單咁講死 CF 咭，就係死 card！！！ 咁姐係話，全日行餐死既相無晒！！！ 發晒癲，上網搵咗幾個 救 card 程式 黎急救張 card 都失敗。 當時我真係發晒皮氣好唔開心架， 沖完涼出黎既 花輪同學 見到我咁，就叫我去沖涼冷靜下先， 既然問題出現咗，暫時又無辦法解決，急、唔開心都對事情無幫助。 沖涼果時諗，又覺得有道理， 返出黎，個人平靜返，之前既問題係試果幾個程式都係用黎救 card 救圖檔， 而我部機係用 Sony Raw 格式，一般程式未必認得到。 所以就轉左去搵隻救 hard disk 檔案既程式黎試，貪佢可能搵晒唔同類型既檔案出黎， 果然，一 scan 就搵到，當場放下心頭大石。
一早訓醒，去京都巴士總站搭 100 號巴士再去清水寺， 因為今日既行程，係以巴士去洛東同洛中為主， 所以又可以用張『京都市巴士一日乘車券』。 為咗逃避人潮，我地都算幾早搭搭車， 響五条坂下車，見三叉口轉右清水道茶碗坂，盡頭就系清水寺入口。 因為八點鍾，所以遊客未算好多。
同沉晚唔同，沉晚響清水寺未到入口就己經要收入場費， 不過日頭就到本堂前仲係免費，到達本堂，先要比￥300入場， 清水寺既入場券，仲會依四季唔同而有所變化。
清水寺係京都最古老既寺院，建於公元798年，佔地面積13萬平方米， 相傳係由唐僧在日既第一個弟子 ~ 慈恩大師建造。
大殿前為懸空既“清水舞台”，由139根高數十米的大圓木支撐。
走入日本寺廟或神社，應該都會見到響某些角落，除了有用來綁籤詩的繩子之外， 仲會掛滿了木牌子既架。木牌正面係寺院既特別彩色圖案， 背面係寫著祈求既事情，同許願人既姓名。 果塊木牌，就叫做繪馬。
古日本信仰以獻祭活馬黎向神靈祈願，時代變遷，由活馬改成土馬、木馬。 之後再改為將馬畫響木板上，慢慢就形成今日既繪馬。 個別寺院，仲會因干支、氣節既改變，而更換唔同圖案既繪馬。 正因為每個寺院既繪馬都有唔同既特式，所以亦可當為一種土產手信， 如果唔係拎去許願，買果時仲會附送紙袋比人『打包』。
清晨既清涼寺，以上左年紀既遊客居多。 生活，其實唔洗太複習。 希望就算老咗，都仲有氣有力，仲可以同鍾意既人賞楓。
穿過本堂，就會見到以求姻緣出名既地主神社。 地主神社位於清水寺正殿北側， 神社內良緣之神極受日本年輕人歡迎， 響入面，終日可見祈求良緣既年輕人虔誠參拜。
地主神社入面有一對相距10米遠既「戀愛占卜石」， 相傳如果能夠閉著眼，從一邊既石頭走到對面既石頭前， 兩個人的戀愛便會如願以償。如走偏了，很可能要出現一些波折。
其實，同真正戀愛一樣， 響戀愛路上，有人既路比較長，要多走冤枉路， 有時唔知行咗去邊，總有迷失既時候， 而有人就可以一步到位，白頭到老。 但無輪成功、失敗，我們從中總有得著，亦係人生既一種經歷。
地主神社內有「幸福鑼」，敲響「幸福鑼」，其響可達愛神之處， 以求愛神恩賜良緣。除了戀愛占片石，地主神社還有許多求良緣的妙方，
神社備有各式戀愛御守，都深受年輕人歡迎。
為左願望達成，大家當然要表達少少心意， 不過估唔到有香港人咁大手筆。 嘻，唔知佢地既願望成唔成真呢？
離開清水舞台，行過阿彌陀堂，沿大路落山， 左邊有條唔起眼既小路，有個牌仔指三重塔， 沿小路行上山，響山頂可以望到清水寺全景。
清水寺正殿旁有一山泉，稱為音羽瀑布，終年不斷， 被列為日本十大名水之首，清水寺亦因此而得名。
三道泉水，分別代表長壽、健康同智慧， 只能飲一道，如果連喝兩道以上，咁就無效了。 不過，見好多人都係三道飲晒。
音羽瀑布比喻人生既選擇取捨， 戀愛占卜石比預戀愛路上順利與波折， 碎石小路比預肅穆靜心， 其實，以幾日所見，日本寺宇神社， 都總以種種環境比預著人生道路。
JR京都駅→五条坂駅 五条坂駅 → 清水寺 清水寺 → 地主神社
離開清水寺，清水坂既舖頭都己經開鋪，不過大部份都係賣手信。 沿清水坂落斜路，行到五年坂三叉位，轉右手邊就可以落三年坂。 三年坂又名產寧阪，係從二年阪去清水阪途中既一條石板路，類似中環既石板街， 三年坂被選定為日本國家重要傳統建造物群保存地區。 傳說，如果響產寧阪跌倒，三年之內必有大難臨頭，就咁，產寧阪又有三年阪之稱。 因為咁，我落斜果時都特別小心，一下唔好彩，咁就真係『仆街死』啦！！
二年阪係從高台寺伸延至產寧阪的一條大約長200米的石板小路。 保留左京都古建築特點，古老既町家式建築沿山路兩側連綿不斷。 正由於二年阪保留左獨特既歷史原貌， 亦選定為日本國家重要傳統建造物群保存地區。
就響二年阪半途，有一間好細，好唔起眼既鋪頭仔， 依間鋪頭，亦係我地去二年阪既主要目的。
價目表只賣依幾樣野。
依間其實係一間有九十年歷史既甜品店。 入面好細，只放得落五張四人台，緊緊夠位轉身。 如果唔係有心去搵，真係點都唔會留意到佢既存在。
街外好凍，一入到去，只能同婆婆以『手語』溝通。 坐底之後，婆婆馬上送上熱茶，帶來一詩溫暖。
全舖只得我地兩個外地人，其他客人都係中老年既日本人。 佢賣既甜品，係傳統炭火烤年糕片，大紅豆年糕甜湯… 我地叫左個三色荻乃餅同紅豆甜湯。
三色荻乃餅，三色代表三種唔同既皮同餡，而『餅』，響日本係指麻糬。 據說，以西洋寫實同東洋詩趣，而著名既畫家詩人『竹久夢二』， 就經常同情人黎依度食甜品。
紅豆甜湯，其實就係大納言紅豆加上傳統烤年糕，感覺上好似紅豆沙湯圓。 日本傳統烤年糕，睇卡通片就睇得多，我都係第一次食。
一邊食，一邊欣賞店內充滿歷史味感既擺設， 慢慢就發覺，我地食緊，除左係甜物之外，更加係八十年既傳統。
離開『甜湯婆婆』繼續響二年阪行， 有間叫『夢藏人』既鋪頭，入面既地藏好靚， 自已都忍唔住買左個。
沿路轉上八坂通， 就會見到八坂塔。
響洛東，經常會見到藝妓既人四出走動，當然，佢地唔係真係藝妓，而係扮架啦。 日本既藝妓文化係由京都開始向外發展， 而京都藝妓起源可追溯到十七世紀，而發源地就正正係我地身處既東山。
藝妓會用一種液狀既白色顏料均勻塗滿臉部、頸項， 但頸後邊緣總會刻意留下不施白粉既『W』型，等人能夠手到佢地既自然的膚色。
沿八坂通，我哋漫步到祇園，途中經過充滿古老風貌既花見小路通。 街入面滿報竹籬紅牆既茶屋、高級餐館、日式料亭。 不過成條花見小路，感覺上過份堆砌，反而唔及二三年坂吸引。
行到去祇園，經過八坂神社又入去望下， 八阪神社位於京都市內四條通大街盡頭，係日本全國祗園社的總本社。 入去主要原因係唔洗入場費，講真，又係寺廟，都開始有 D 悶。 本著可有可無既心態，竟然響入面忍唔住手，買左個大繪馬。 其實之前 plan 每去一個寺廟，都買塊繪馬作記念， 不過￥真係升得好緊要，真係唔捨得亂買嘢。
八坂神社
響八阪神社轉個圈，就返出黎坐 46 號巴士去四条河原町。 由祇園去四条河原町其實好近，就算行都行到去， 不過行咗成朝，真係腳都斷。
四條河原町大街係京都最繁華既中心地帶，亦都係主要既購物區， 全京都最著名百貨商場都集中晒響度。 以我哋既性格，去到果道，當然唔係為左買野啦， 我哋去既主要目的，其實去位於內街既錦市場。
入面就有各種店鋪，銷售各種生鮮食品、日常生活用品、各式小食。 因此，錦巿場又被稱為京都既『廚房』， 而環境就好似香港既舊式街市，不過就整潔好多。
錦市場尤其出名係京醬菜店，而其他店鋪亦古香古色。
錦巿場商店街天花頂都有防雨頂棚，買嘢唔受天氣影響， 響依度可以行吓，食下吓食，感受一下地道京都人既生活氣氛。
祗園 → 河原町錦市場
感受過一般京都人既生活，我地沿四条通行返出四条河原町， 經過橋本町之後就轉左行入先斗町。 先斗町係一條同鴨川平行既小巷，一帶充滿高級餐廳、酒吧。 其實先斗町己經有三百年既歷史，一直以來更加係京都既美食中心。
河原町錦市場 → 鴨川先斗町
行到先斗町既盡頭，就會見到鴨川。 鴨川其實係一條河，由北到南貫穿京都中心。 平時去旅行，旅遊書只會介紹大地去睇各大名勝，去邊瘋狂買野， 只係睇睇，己經覺得滯。
鴨川兩旁，無日劇背景，無幻彩激光 Show，無過節燈飾、無大減價… 依度只有坐響河旁既戀人、自得其樂既老人、練習跑步既棒球隊、 踩單車返屋企既學生、淙淙既流水、肥大既魚…
鴨川，正正係京都居民既公共空間， 公共空間，響香港，只係地產商換地既借口、金雕玉砌既墳墓、禁止牌既展覽場… 坐響鴨川旁，靜靜去感受，去體會， 響煩忙既日常生活，比時間停一停，思考一下，等心靈得到平靜。
響鴨川坐到日落，我地就沿四條通行去對面既白川南通， 一進入白川南通，就能感受到京都濃濃的古都風情。
沿白川南通，有條小河，岸邊布滿掛著竹簾。 依 D 竹簾，就係京都最傳統既茶室，亦係京都最高級既食店。 不過佢地唔太歡迎陌生既觀光客，只做熟客生意。 如果好運，更加可以響夜晚有機會碰到真正既藝妓。
雖然只係五點幾，不過個天就己經黑齊。 行左成日，己經行到無晒力， 所以今晚唔出去食啦，決定響京都伊勢單掃外賣返民宿食。
返到民宿，發現老闆幫我地打掃過間房，仲留底字條同請我地食糖。
先斗町 → 鴨川 鴨川 → 白川南通 白川南通 → 京都駅 January 21 京阪遊 Day 4Day 4: 2008-11-26 (三) : 京都，三尾 京都駅 → 神護寺 → 清瀧 → 嵐山 → 愛宕諗佛寺 → 京都駅 → 夜遊清水寺
今日既行程，主要係行山路，亦係成個行程入面最費腳骨力既一日。 一早就要由京都市去高雄，再經清瀧步行至嵐山， 之後夜遊清水寺，全日行程，大約步行近十幾公里路。 高雄其實上面有三座寺，高山寺、西明寺、神護寺， 其實三座寺都想去，但諗起由高山寺到神護寺又要行幾公里山路， 加上要避開人潮，最後選擇只去楓葉最出名既神護寺。
由京都駅去神護寺最方便方法，就係響京都巴士總站搭去 高雄JR巴士。 京都巴士總站有來回一日券，票價800￥，可以多次往返、中途上車， 如果打算去晒三座寺就一定要買，可以慳返唔少腳骨力。 不過今日我地打算清瀧行落嵐山，所以只買張 500￥既單程票。
京都駅 → 西山高雄
再行大約五分鐘落山路，落到谷底過橋， 就會發現一條好長好長既石梯，好彩沿路風景都好靚， 唔係真係咩住幾咁多野，行都行到無晒癮。
坐響楓葉下食野，我諗感覺唔錯。
從石梯再行十幾分鐘上山路就到達神護寺。 唉，真係少運動，行到尾段，差唔多係爬上去咁濟。
就係比善信丟碟仔落山谷。￥100，2 個碟， 丟落山谷就幫到你去除厄運。 我都丟左 2 個，不過以厄運程度黎講，應該要丟20個先夠。
從高雄，沿住清滝川行到嵯峨清滝，大約要行三公里。
斗笠：福報好運，隔離從天降臨的災難。 其實都幾似我，哈。
行呀行，風景真係好靚，好鍾意依段路，一路上有清滝川既河水聲， 山中既空氣亦特別清新，加上一大片紅葉既畫面。 山路上，見到好多同我地一樣行山既老人家，大家雖然唔識對方，
到落到山見到垃圾筒先掉。 我諗，香港人有無可能學到人地既自覺性、愛護自已既地方呢？
等 28 號當日既行程可以輕鬆 D。
當初都好猶疑，因為見條隧道係單線雙程行車，覺得咁窄，人行咪好危險。 後尾見個阿伯就咁行入去，所以決定跟入去。
大約幾分鐘既路程，就到達嵐山。
今次決定去日本，某程度上，係因為見過愛宕念佛寺既相， 深深被入面唔同既羅漢像吸引。
最特別既係佢地頭頂生滿青苔，睇落去就好似生左綠色頭髮咁。 又天陰陰無光，無辦法影到好好既相。
愛宕諗佛寺
不過旅行旺季既嵐山，交通真係好擠塞， 返到京都駅，都成四點，隨便食個意粉又準備去清水寺賞夜楓。
本來寫明夜拜時間係由六點半到九點半，但見已入得場咪跟大隊入場。
好後悔無返個頭痛符，家下執相寫遊記搞到頭都爆。
睇左好耐先知原來係水中倒影。
JR京都駅→五条坂駅 五条坂駅 → 清水寺
離開清水寺，沿清水道行返去巴士站， 點知巴士站改左，自已又睇錯地圖行左相反方向， 結果行下行下，發覺唔對路己經係幾個字之後。 唔想返轉頭，又唔熟路，最後決定坐地下鐵由清水五条返京都。 去到地鐵站，真係大鄉里，對住個售票機都唔識買飛，又唔識轉車。 幾經辛苦先返到京都駅，見肚餓，又想食拉麵， 不過十點所有食肆都閂晒門，最後行返民宿對面便利店買野食算。
January 06 京阪遊 Day 3
Day3: 2008-11-25 (二) : 京都，洛東 大阪駅 → Check out → 京都駅 → 中野屋 check in小休 → 銀覺寺前→ 哲學之道 → 永觀堂 → 油墨鐵道 → 夜宿中野屋
酒店唔知做咩，個暖氣 set 得好勁，第一晚都忍到， 但到第二晚真係太辛苦，到左我呼吸困難既地步。 忍唔到，打去服務台，不過中央暖氣佢地都無法。 最後服務員幫我閂左個暖氣，又比左個風扇我， 等空氣流通少少，個人先好D。
今日一早就起身 check-out 去京都。 經過沉日既經驗，再無響地鐵站盪失路。 其實響京都，一般的商務旅館同民宿價錢差唔多。 不過響每年既櫻花紅葉旺季，京都既酒店屋宿都好爆滿。 雖然去旅行前四個月己經開始搵，但平既商務旅館一早就比人訂晒。 我都要寄左十幾個 mail先搵到一間有位既民宿。
原來民宿真係好近，由京都火車站行六分鐘就到，因為預計自已會一早入住， 所以之前己經用 email 同老闆中野先生聯絡好，會提早十點到京都。 最後都係比預定時間仲要早左幾個字。
條樓梯好窄，拎住大行李轉身都幾頭痕， 我地住既房間響四樓，拎到上去，就知自已平時少運動，直頭想死。 老闆會講國語，仲好熱心的提醒我地要注意既事項。 又介紹京都有咩好去處，附近既便利店、洗夜店。 睇落去間房都幾乾淨，仲有 internet 供應 ，正。
大阪駅 → 京都駅 方式：ＪＲ 時間：全程27 分鐘 費用：￥540
前一日去既奈良，係日本奈良時代首都(710-794年)，古稱平城京， 而今日到既京都，就係日本平安時代首都(794-1192年)，古稱平安京。 平安時代，整個京都係以中國既『王座朝南』思想而建， 初時係仿照當時中國城市而設計，分為東西兩個部份， 東面，係仿『洛陽』而建，而西面就係仿『長安』而建。 而京都既市區地方係集中響東面，所以市區各區會以洛中、 洛東、洛南、洛西、洛北黎稱呼。
收拾好行李，就行返去京都駅，經過地下街巴士服務中心， 買定幾張京都市巴士一日乘車券。 因為之後果幾日，都主要以巴士為主。 呢張 ￥500 既都市巴士一日乘車券，己經包左京都市內最常用既觀光巴士線， 平時坐一程巴士都要 ￥220，所以坐3程巴士已經回本。
雖然唔係假期，但紅葉期間，巴士總站長期人頭擁擁。 尤其係 100、206 號線，無論係一早定定係夜晚，都會見到長長既人龍。
香港繁忙時間坐地鐵迫？ 旺季坐京都巴士仲迫呀，直頭就係肉貼肉。 巴士上面又有好勁既暖氣，真係又焗又迫。 不過就算幾迫，佢地都會讓坐畀有需要既人， 睇下個 BB 幾咁得戚，我就迫到成身汗又焗到眼鼻水都出。
由第一個站企到差唔多最後果個巴士站，總於到達目的地『銀覺寺前』。 不過落車見到個天開始陰，當場打個突。 唔係麻，沉日響奈良先做完落湯雞，今日又黎？！
京都駅前 → 銀覺寺前 方式：巴士 100號，5號 時間：30分鐘 費用：￥220 流程：京都駅前 坐市巴士 100、5號到 銀覺寺前 徒步 10 分鐘
銀覺寺前面有一條大街，成條街都係賣手信同埋小食。 沿住大街，一到行到銀覺寺直門，見好多人，又唔係好有興趣，所以無入去。
好多鋪頭門口都放左免費熱茶任人飲，行得倦仲可以入去坐下。 咁鬼凍，飲杯熱茶真係唔錯，不過個綠茶泡乎真係麻麻。
行返出大街，就會見到『哲學之道』既指示牌。 『哲學之道』係由於日本哲學家西田幾太郎經常到此散步而得名。 係一條由銀覺寺前到若王子神社，全長兩公里既散步小路， 沿路同琵琶湖分流渠並行，仲會有一大片櫻花樹、紅葉。 最出名係響櫻花盛開春天，聽講夏夜仲會有螢火蟲。
哲學之道其實都幾窄，階磚路得大約一米， 路既一邊就係琶湖分流渠，另一邊就係車路。 雖然話係渠，但河水極之乾淨，久不久仲會見到好多手瓜咁大條既大魚游黎游去。
沿哲學之道 兩旁，都係 D 民居、coffee shop、精品店同埋寺廟。 哲學之道精品店買既貨，比較特別，同銀覺寺前手信街既貨好唔同， 好記得有間鋪頭係賣手做風車，仲響鋪頭週圍插滿晒風車。
不過正因為有烏雲，亦有機會見到一陣陣既耶穌光。 有光，同無光，分別真係幾大。
個天促開始暗，好似想落雨咁。
響日本，好常見到咁既公園仔，而響香港， 因為種種原因，依類陪伴我地成長既公園己經被淘汰。 原因有好多，不過最好既借口都係安全問題。
以前，我地跌過、傷過，知到痛，痛得多，我地識面對、識處理。 但而既小朋友，己經係過份保護， 保護都再唔識面對問題，唔再用腦……
哲學之道 方式：步行 流程：從 銀閣寺 步行到 若王子神社 大約兩公里
離開哲學之道，行返出大街，大約十分鐘， 就到『永觀堂』。 因為係紅葉旺季，所以到處人山人海， 入場費仲要加到成千￥，真係識搶錢。
永觀堂，洛東數一數二賞楓既好地方， 尤其被周邊紅葉包圍既多寶塔，直頭好似紅海咁。
不過行左一陣，個天就落起毛毛雨， 見唔係太多人排隊入禪林寺本坊，又怕越來越大雨， 就雞咁腳衝去排隊。好彩排先一步， 一入到本坊，外面就開始落大雨。
沿住本坊後山既山路一直行，就可以上到山上既多寶塔， 上到塔又停晒雨，仲出埋耶穌光， 響上面仲可以欣賞到京都全景。
禪林寺本坊
阿彌陀堂前小地藏
離開禪林寺本坊，行唔夠十五分鐘，又開始落大雨。 今次仲越落越大，結果成班人屈晒響避雨亭。
簡直係奈良既翻版，又係雨後靚陽光。
停雨後，仲有和尚圍繞永觀堂既誦經活動。
永觀堂 開放時間：9:00～16:00 入場費：1000日圓（11月）
離開永觀堂，天色開始暗，又開始落毛毛雨， 沿住南禪寺一直行，行大約十五分鐘，就會到仁王門通。 響南禪寺前巴士站，會見到一條荒廢左既油墨鐵道。 鐵道係為起琵琶湖疏水道而建，鐵道建成後就被荒廢。 上網搵過資料，只要響琵琶湖疏水記念館附近，就會搵到條有鐵襲既樓梯， 可惜天色暗，又落雨，最後都係放棄。
見雨越黎越大，就響南禪寺前巴士站對面一間舊式咖啡店醫肚。 見佢舊舊地，但收得比平常食店貴。 叫左個咖哩牛豬飯同意粉，出奇地好味。
食飽飽，坐到停晒雨就走。 見時間仲早，就諗住坐 100號巴士去夜拜清水寺。 行到京都市美術館，就見到好有既平安神宮大鳥居， 『鳥居』系日本神社建築物，幾似中國牌坊建築。 主要用黎區分神界同人界，算係一種結界， 代表神界既入口，亦可視為「門」。
行到巴士站，好多人排隊，迫到完全上到車。 見唔系辦法，咁就懶醒咁行前一個站。 雖然行前左一個站，但都無辦法上到巴士， 等下一班、等下又一班。 就連最後一班車都無埋。
無左最尾班車，只好坐 46號巴士先去治園，之後再轉車， 好彩今日一早用左一日乘車券，如果唔係坐巴士都坐到窮。 幾經辛苦先返到治園，本來想去清水夜拜，但可能淋完雨， 夜晚又大風又凍，個人又開始發晒冷， 結果都係再轉 206 巴士返京都駅行下算。
今日行左好多地方，但行完京都駅其實都係六點幾。 食完咖哩無耐，可能天氣凍，但又肚餓，想食野。 就響京都駅入面搵間鋪食拉麵，估唔到又幾好食。 唔怪得人地話，響日本隨便搵間鋪，D拉麵都好食。
December 28 京阪遊 Day 2Day 2: 2008-11-24 (一) : 宝塚，奈良
第二日起身，準備去宝塚既行程。 食過沉晚響便利店買既早餐，食埋藥，就出發。 行出酒店門口，就己經係大阪地下街 D-39 出口，好似好方便。
沿住路牌行，好快就到 JR大阪駅， 第一次買 JR 車票，搞左一陣先買到。
上到月台見岩岩有架新快速走左，不過因為比計劃既時間早， 月台上既顯示器見班次咁密，所以可以慢慢等下一架新快速。
月台黃線前，有好多指示，快速入口、新快速入口、 女性專用車箱、特別勁既暖氣車箱……
除處都可以見到優先讓座既提示。 的確，響日本咁多日，見佢地上火車真係幾有禮貌， 唔會好急，只會一個跟一個，真係會讓座比有須要既人，亦唔會搶先爭位坐。 上到車通常都見佢地用部電話黎打 message，唔會好似香港咁， 大大聲講電話，將自已既私穩公諸同好。
大約坐三十分鐘，就到達 JR宝塚駅。 出到車站天陰陰，仲有 D 冷，向左沿路行兩分鐘就見十字路口。 響香港，己經無依種人、車、火車共用既路。 以前住上水，岩岩有電氣化火車果陣，火車既班次無咁密， 仲有條咁既路，不過後尾一次撞火車既意外之後就無埋。
十字路口另一邊，就會見到 阪急宝塚駅，穿過商場， 沿著一條似足歐洲小城特色既『花之路』一直走， 途中仲會經過好出名既寶塚歌劇院。 雖然係朝早八點幾，但己經有長長既人龍排隊等入場， 週圍仲有一隊隊拎住相機既師奶兵團等追星。
團員需要響寶塚音樂學校經過為期兩年既嚴格訓練同教育， 音樂學校學生畢業後就能夠登台演出。 歌劇團既成員全部均為未婚女性，男角亦係由女性反串演出， 團員如果結婚，就需要離開劇團。 近年好出名既天海佑希、黑木曈…… 都係出至寶塚歌劇團。
離開左班師奶兵團，繼續沿花之路行呀行… 行呀行… 又開始落毛毛雨。
繼續直行五分鐘，就見到一幢長長既建築物， 亦係今次到宝塚既目的 ~『手塚治虫記念館』。
入口前有個巨型既火之鳥雕像， 而門口前既小園，地上面有好多手塚治虫卡通人物既手印。 建築物外牆、柱上亦有經典卡通人物既剪影。
去到正門入口，本來記念館開門時間係九點半， 但雨越落越大，工作人員就提早放我地入去。 一入到去，就見到一個小飛俠同埋其他經典人物既大型天花， 而地板，亦用麻石砌左個巨型手塚治虫像。
向左行，就會見到手塚由誕生開始，到成為漫畫家既介紹展覽， 入面仲有好多手稿同模型，展示佢既一生， 記念館員工亦會提供繁體中文/英文說明書。 響另一面牆上面，羅列左手塚作品既大事年表。 行到盡頭，就一個小型電影院，見岩岩過左放影時間， 就上二樓睇左其他展區先。
二樓，其實係精品店、書店、cafe、特別展覽廳。 特別展覽廳入面，會見到手塚誕生80周年記念既模型蛋糕， 蛋糕上仲有一比一既卡通人物。
行過 D 就有一排手稿彩圖。
日本最新既小飛俠產品， 我對個死肥豬小飛俠好有興趣， 望住佢，就好似自已化身為小飛俠一樣。
最新既 09年美版3D小飛俠，不過我真係睇唔慣鬼仔樣小飛俠， 仲有鬼佬天馬博士同無左個大鼻既茶水博士。 http://www.astroboy-themovie.com/
再行過 D 就係繪畫園地，小朋友既創意真係勁， 我好想比個獎畫 麵包超人 crossover 小飛俠 果位小朋友。 不過響精品店真係比我見到 鬼太郎 crossover小飛俠 既精品， 好後悔無買返幾件返黎。
再落最底層，果道係比小朋友玩既園地，有導師教繪畫。 仲有幾個 low tech扮 high tech既道具展品，果然係比小朋友玩既地方。
上返地下，個人又開始唔舒服，可能朝早食既藥力發作，個人暈暈下。 外面又落緊大雨，見岩時間，就走左入小影院睇短片。 短片以手塚治虫童年、自然、愛、和平作主題， 沒有對白，只有好柔和既音樂。 大約十五分鐘既短片，一陣就睇完，離開影院， 見仲係咁大雨走唔到，記念館又開始多人，決定入去影院睇多次， 不過今次入去系閉目養神，隨著柔和既音樂，舒服既戲院凳， 咁就訓左十五分鐘，成個人精神晒， 見雨勢無咁勁，咁就離開記念館。
手塚治虫記念館 地址：兵庫県宝塚市武庫川町7-65 http://tezukaosamu.net/jp/museum/index.html
對於手塚治虫，認識最深係怪醫秦博士同比較冷門既火之鳥。 第一次接觸手塚既故事人物就係怪醫秦博士，我好記得個故事叫人面瘡， 係講良心化成了人面瘡既故事。 細路果時睇完全唔明白，仲以為係鬼故，但長大後再睇， 就比手塚果種描寫人性既手法吸引住。 而火之鳥，係幾年前無線深夜播放果時睇到， 一睇，就久久不能忘懷。
鹹蛋超人、大鐵人十七、高達、小雙俠、小飛俠、幪面超人、 藍寶石皇子、再造人009、怪醫秦博士、黃金戰士、神勇飛鷹俠…… 只要年過三十，無乜邊個唔係睇以上張卡通片大。
對於大家好熟識既小飛俠，雖然而家叫呀童木， 但我都係鍾意叫佢做小飛俠，就好似多拉 A 夢 同叮噹一樣。 今次去手塚治虫記念館，只不過係重拾童年回憶既借口。 其實館入面放左 D 咩，根本唔緊要，見到手塚經典人物既造型展品， 就會回憶一班陪我成長既卡通人物。
差唔多行到阪急宝塚駅又開始落大雨， 見仲有好多時間，咁就響商場食碗簡單既手打烏東。 離開商場，可能真係天雨關係，發覺真係好凍好凍， 所以決定先返大阪酒店著多件厚衫，之後再去奈良。
返到大阪，就搵一早出門就影低左既 D-39 出口，以為自已好醒實唔會蕩失路。 點知原來係懶醒，響大阪站地下街地圖，跟本唔會顯示 『D-39 』咁細分既出口。 結果響地下街蕩失路，係咁兜圈兜左幾個字，問工作人員，佢又唔識英文。 最後好底能咁行返出地面慢慢搵路。 不過最底能既係，換好衫返去搭火車果時， 先發覺其實只要一出車站，轉右落樓梯直行就到 D-39出口， 而自已之前就一直轉左咁行，仲要行左幾左幾個圈，經過個出口幾次自已都唔知。 你話係唔係死蠢呀！！
* 著多件羊毛底，加多條頸巾，成個人暖晒。 由大阪坐一個鐘 JR 就到奈良駅。 奈良，古稱平城京，日本奈良時代既京城。 係模仿中國唐朝都城長安而建。
落左車，響車站拎份當地地圖， 沿著三条通一路直行，大約行十五分鐘， 就會到達奈良公園入口既鳥居。 由於天雨既關係，人流比想像中少。
通過鳥居，就會見到一條碎石路。 響日本傳統，凡通往大殿，總有條鋪滿碎石既路， 作用系清潔鞋上既污物，深意係清心除邪，以作靜心之道。
進入奈良公園，隨處都見到鹿。 鹿唔怕人，仲生得牛高馬大，加上落雨，佢地 D 毛濕晒痴到達達， 遠望，去好難分佢地係鹿定係牛。
唔好比佢地見到你有食物，如果唔係就會死跟住你唔放。
行到鹿苑雨勢又開始變大， 有時仲見到一群群鹿跑來跑去， 有 D 鹿群就響樹下避雨。
本來想由鹿苑行去春日大社，但雨勢實在太大， 個天又陰陰，最後選擇去近 D 既東大寺， 反正天氣咁差，諗住此地一遊，行一陣就走。
見到東大寺入口『南大門』，近睇真係大到嚇死人。
本來就收晒機開晒雨縷，準備行陣就走， 點知入左南大門之後，突然出太陽停雨，真係玩死。
依隻鹿絕對唔獨食，當見到有野食，就係咁大叫，開頭唔知佢做咩叫得咁大聲， 叫多十幾野之後，佢後面就有十幾隻鹿仔唔知響邊衝埋黎。
落完雨之後出 magic，真係玩死。 都未到四點，就己經差唔多天黑。
太陽一落山，就起大風，仲好鬼凍。 離開奈良公園，漫步返三条通。 不過一天黑，大部份店鋪就關門。
行左成條三条通，好多食肆都關晒門。 又唔想返大阪先搵野食，行經間咖啡店，見有咖哩食，咁就走入去。 侍應好細心比左本英文 menu 我，不過都係睇左好耐，先清楚個叫法。
佢個叫法係先選咖哩辣度，之後選肉類，最後揀菜，就好似香港既車仔麵咁。 睇左好耐，懶睇英文，懶醒睇日文，見到個『牛』字就叫， 結果黎左 牛什 + 豆腐 + 唔知咩豆，難食到呢！！ 但個沙律就好好味~
返到酒店，發現幫你清潔個姐姐會留張紙簽埋名， 感覺日本人響依類細節令人好窩心。
December 26 京阪遊 Day 1Day 1: 2008-11-23 (日) : 香港，大阪 香港機場 → 関西空港 → 大阪駅 → 大阪第一酒店 check in → 夜遊梅田
提早兩個鐘己經到達機場，因為之前 48 個鐘， 己經從國泰網上預辦登機，所以唔洗再揀位，真係方便。 將行李寄倉之後就同 花輪同學 食個早餐，安安心心等十點上機。
咁響飛緊果時個耳膜會好痛，直頭會痛到爆頭。 好彩呀妹之前一晚買左大量收鼻水藥比我，等我上機前收一收藥水。 雖然無耳膜痛，但架機好焗，加上機上既暖氣，我簡直呼吸困難。 人在高空，世界很大，人很渺小。 希望之後七日既行程，事事順利。
到火車站入面搵到好搶眼既 JR 綠色招牌。 入到去第一件事排隊買 JR PASS， JR PASS 分為 Kansai Area Pass 同 Sany Area Pass，最衰一定要連續日咁用。 因為今次行程要一日坐 JR週圍去既地方唔多， 所以只買29號果日既一日 PASS ￥2000， 到時坐JR特快Haruka 由京都到至関西空港。 如果唔用 Pass 一程己經要 ￥2980，所以坐一程Haruka已經回本。 JR West Rail Pass 除左可以JR大站 (関西空港，京都，大阪，新大阪站等) 買到之後， 仲可以響香港既旅行社代辦，響香港買一般仲會平 4%。 http://www.westjr.co.jp/english/travel/jrp/index.html
入面除左可以換購 JR PASS 之外， 最緊要係可以訂埋 嵐山トロッコ觀光小火車 車票， 因為係旺季，如果去到嵐山先買一般都買唔到。 若果由Torokko嵯峨站出發，右邊位置會靚d，C/D位是順位； 所以，由Torokko龜岡站出發，就左邊位置會靚d，A/B位是順位。 計劃訂廿七號車票，但實在太爆無位，好彩工作人員好熱心咁幫我每日咁搵， 雖然言語不通，不過事前己經寫定左 d 日文，加上指手畫腳， 終於買到廿八號 由Torokko龜岡站 9:18分出發，右邊 A/B位， 仲要係果日既最後兩張連位，好彩好彩。 http://www.sagano-kanko.co.jp/
為左唔想迫同坐得舒服 D，所以放棄坐JR關西快速， 而選擇坐三點十分既機場巴士。
￥1300，大約70分鐘車程，第三個站落車， 就響酒店附近，不失為一個唔錯既選擇。
感覺上補充左好多維他命C。
落車就見到 Hilton，再行 5 分鐘就到大阪第一酒店。 酒店門口就己經有地下鐵站入口，好方便。
日光日白有太陽完全唔覺凍，但太陽一落山，氣溫就會由十幾度跌到得五至八度。 一落樓，就見到大阪既坑渠蓋，幾特別。
但一行入隧道地下街就迷路。
只不過日本人識著衫識打扮。 條街好多人，男女衣著都好靚，個個女仔都化得好勁。 但係就個個都化到差唔多，深眼線、深眼影、假眼睫毛…… 慢慢就己經再分唔清楚每張面孔。 感覺上成條街既人都帶住同一個面具咁，諗起都有點恐怖。
不過睇落去，其實無乜特別，只不過係機同鏡齊 D， 相機袋同地頸帶多款 D，響而家日圓咁貴既情況，真係唔舍得買。 最近，對攝影心態己經好唔同， 以前，乜都想試乜都想買返黎玩， 而家，無所謂啦，用咩都係咁影，拎部傻瓜機都得。 又唔係用攝影黎搵食，亦唔係要黎出名， 影相，作為興趣，作為嗜好，最緊要都係開心。
我同 花輪同學 都唔係太鍾意行街買野既人， 睇完相機，行多陣書店，都開始覺無聊，咁就行返去東梅田食晚餐。 響御堂筋近梅田 OS 入面有條食街，入面有好多食店。 不過對於仲係病緊既我，都係食碗拉麵算。
看圖識字，不過到點麵果時，發現個女侍應係同我地講國語， 睇佢個名，仲應該系中國人。
傷風喉嚨痛，都唔敢叫餃子食。嗚嗚嗚。
神道教最初以自然崇拜為主，屬於多神信仰， 概念上，神道教既『神』係靈、靈魂既意思。 佢地認為天下萬物皆有靈魂，一草、一物都跟人類一樣， 具有同樣的價值同權利，視自然界各種動植物為神祇。 所以會見到無輪由山嶽、樹木、狐狸等動植物， 到天皇、幕府將軍、功臣等，都會成為膜拜對象。
住響廿一樓，面對 Hilton Hotel ，仲可以望到少少大阪夜景。 望緊夜景果時，仲比我望到對面 Hilton 有d 烏糟野！！！真係該猥 ！！ 酒店房比想像中大，不過暖氣就好勁好勁，仲要無得 set 細 d， 對於仲病緊又有嚴重鼻敏感既我，真係搞到眼鼻水長流。
當初個計劃，係全部七日住晒京都，但因為京都酒店民宿全滿， 只可以選擇大阪住兩晚，京都六晚。
但總係介紹買買買，自己唔係咁鐘意。 之後上網搵料，搵左幾度一般人好少去既地方。 對於大阪，睇過書介紹，印象係好繁華好熱鬧既地方， 但旅行書所展示，往往只係消費過度既繁華，沒有靈魂既熱鬧。
旅行的義意，每個人都唔同，但對我黎講， 必須親身經歷，去嘗試理解背後義意，去感受當中既文化。 December 19 雜記去完京都，到今日先執晒 D 相，實在影得太多。 今個月公司唔知做咩好忙，日日無停手。 之前放 blog 相果個 web host 又轉左左名， 最近 spaces 又大改版，越改就越衰越難用。 雖然相就執晒，但遊記仲未開始寫。 *
從相識那一天開始，我們便約定要一起去這些地方。 梅田
宝塚手塚治虫記念館
奈良公園
哲學之道
永觀堂
神護寺
清瀧川
愛宕諗佛寺
清水舞台
清水寺
地主神社
三年坂
先斗町
トロッコ列車
竹林之路
嵐山
東福寺
December 02 豆腐京都行
終於響日本返黎香港，面對大量既相，真係好頭痛， 個行程其實 Plan 左幾個月，決定去果時日圓係對緊 71， 可惜頭幾日帶病響身，加上鼻敏感，搞到晚晚都好早返去訓。 以下係部份行程資料。 【行程】 Day 1: 2008-11-23
(日) : 香港，大阪
Day 4: 2008-11-26 (三) : 京都，三尾
【住宿】 日期：Day 1-2: 2008-11-23
~ 24 (日 ~ 一) : 大阪 日期：Day 3-7: 2008-11-25
~ 29 (二 ~六) : 京都 【交通】 JR關西pass(JR
West Rail Pass - Kansai Area Pass) 京都駅乘JR特快Haruka(はるか)至関西空港：約75分鐘，要 ￥2980一程。 但可以響香港搵旅行社買左張 JR Pass 先換令卷先，咁就可以再平 4%，之後去JR関西空港站綠色窗口開 pass， 無響香港買定都唔緊要，亦可以響綠色窗口購買關西JR西日本Kansai Area Pass(JR West Rail Pass)， 不過就系正價。1 day pass ￥2000，坐一程￥2980 既 Haruka 已經回本， 可惜每人只可以買一張pass，而2至4日既 pass 一定要連續咁用。
京都市巴士一日乘車券 呢張 ￥500 既都市巴士一日乘車券係最常用既 pass，因為佢己經包左京都市內最常用既觀光巴士線， 平時坐一程巴士都要 ￥220，所以坐3程巴士已經回本，但呢張pass唔包括去嵐 山既巴士線。 龜崗 → Torokko小火車 → 嵐山 其他資料： 紅葉、天氣情報 ： November 10 二千公里霞浦之旅YY 開車來回深圳霞浦，玩左幾日， 總共行二千幾公里。 二千幾公里……… 台北到高雄只不過三百幾公里。 可惜幾日既行程，天氣都好差， 落雨，大霧，直到離開霞浦果日先見到太陽。
用 GR1V 影左幾張菲林，至於數碼… 越黎越懶執，放左響度唔想理。
路途上經過既漳蒲，見仲有光線，響公路落車影幾張， 估唔到之後果幾日都再見到陽光。
第二朝影早出，隧道仲撞車。 車禍現場，成架貨車訓響隧道。
結果我地要落車行出公路收費站。 一路行一路行，好似無盡頭咁。 隧道好直， 回頭看，己經見唔到訓響到既貨車， 向前看，亦好似無窮無盡一樣，見唔到出口。 咁感覺上，無過去，亦無將來。
唔知行左幾耐，總於見到路牌， 後悔無回頭影下無車既公路。
上到山頂己經過晒時，日出曬， 不過就算準時上去又點，咁大霧，都無野睇。 之後去果幾個地方，都無乜心機影了。
霞浦最期望既小浩日出， 去到就落大雨，謝晒。
返酒店途中雨細左，又影幾張。
去到七都，又落雨，真系想咭人七刀。
來回二千幾公里，結果就無乜野影到。 November 06 失魂經過四日，坐左二千幾公里車， 灰蒙蒙既霞浦之旅，返到香港， 又要開始面對堆積如山既工作。 依兩日，真系做到斷氣， 放工前去 ATM 撳錢比家用， 不過個腦比野質實晒，失晒魂， 拎完張咭就掉頭走，直到收工先記得。 咁樣，就唔見左幾千蚊……唉。 October 06 賣車經濟唔好，投資失利， 想儲多幾個錢防身， 又開唔到源，只好節流。
上個月開始，己由開車返工，改為坐巴士。 但經過一個月，情況仍然無改善。 突然諗起，我係咪應該賣車呢？ 當年經濟更差既時候，都無諗過賣車， 估唔到今日依個念頭突然浮現。
不過賣車真係一件好煩既事， 賣比車行就比人壓價壓到好底， 放上網賣比街外人呢，又試又驗又要過數仲要上運輸處， 分幾日去搞，真係好煩。
過幾日，等天氣好少少， 就幫架車影相放上網賣啦。 架車仲放左好多野，有排執。 September 29 JCCACJockey Club Creative Arts Centre ~ Open Studio Date: 27 – 28 September, 2008
參觀過好多個單位，GOD 既單位最多野睇， 好多都系童年回憶。
最難忘就係有個黑房既裝置藝術。 又參觀過琉璃坊既琉璃制成品， 好靚架，仲有班可以上， 不過都系唔好咁多心。 最近學識左，做唔到既野， 唔好講唔好想。
而香港攝影記者協會既單位， 入面有好多有記念性既相片， 睇完，仲送左幾本相集，正。 不過就好重。
離開 JACCAC，去左睇 20世紀少年。 我好鐘意睇浦澤直樹既書， 由YAWARA!、Monster、20世紀少年，到而家既 PLUTO。 尤其鐘意佢對人性同社會現象深層探討。
浦澤直樹既書，用好多電戲分鏡既技巧去畫， 本來以為改為電戲應該好好睇， 點知，希望越大，失望越大。
尋晚收到電話，呀嬤病左，嚇死屋企人， 今日返去睇下佢，好彩都無乜事， 仲幾精神。
今日又買左好多書。 又破產。。。哈
September 23 夢。醒昨晚，發了一個夢。 夢中，身處一個很大很大的廢廠房， 地上，訓了很多很多人，一排排，一排排， 他們都是用白布遮著頭，只見到一對對腳。
我在這廢廠房裡剛學懂飛，飛得浮浮沉沉。 雖然飛得不好，但都好像終於得到自由， 很想飛離這裡個陰暗的廠房，越飛越遠， 還以為可以飛離這裡，但一個得不好， 從高處墮下，跌在一雙腳下， 之後……就醒左。
有時我會發下夢，但慢慢發覺， 就算幾好既夢，都有夢醒既時候。
月尾，情緒比較大起大落， 今日，下晝放半日假，呆在家。 想想自已，真係想做今日既我嗎？ 人生，行了一半，有無努力之自已作主？
可能就差一步，自已的人生就不同， 可能……可能……可能… 只想不做有用嗎？其實是無用的，矛盾就這想出現。 但更多時候，越想行前，越是卻步， 為什麼這樣呢？是怕失敗嗎？ 其實系答案只是怕自已破壞一切。 慢慢，對於自已的事情，由客觀變成旁觀， 客觀、旁觀的分別，是後者較前者少參與感。 |
|
|
